El docteu et s'passiente
El doctor et passiente
El docteur a l’habitude d’aller boère el vinderdi soèr au caboulot (café) d’eusse rue. Y pàs mélieu (meilleur) indrot pou s’vuidier l’tiéte après eune rute semainne.
Come ch’est l’pu écolé (instruit) d’ches buveux, in ne manque pàs de l’testicoter (taquiner) alfos (parfois).
« Hé docteur, in raconte qu’teute fémme ch’étot eune patiente.
Te peux nous raconter, sins t’commander ?
-Si os voulez mes amisses.
Ch’étot un soèr ed sieptimbe. In étot 19h, l’hère (heure) pou mi d’ freumer l’cabinet et d’rintrer al mason.
D’un cop, quéqu’un buque à l’huche. Crénon des aulx ! Que j’me sus dit. J’ouvre quind minme et là, j’vos eune paufe fémme aveuc des yux ed quien battu. J’li dminde si alle peut arpasser dmain et m’a arpondu d’un air si trisse : « S’il vous plaît docteur ! Dmain j’srai pitête pu là ! ». J’ay pàs pu li dire d’arpartir alorse j’ay ouvert et j’li ay dmandé d’s’assir. Alle ravisot l’daine (sol) et avot ses mains intar (entre) ses grons (giron).
J’li ai dmandé chou qu’alle avot et vlàchi chou qu’alle me raconte :
« Doctor, j’sus transparante !
-Pourquo qu’os dites cha madame?
-Cause que ch’est vrai.
-Impossible. Mi j’vous vos bin !
-Pasqu’vos êtes doctor mais aillèrs (ailleurs) parsonne i m’vot. A taule, in me sert pàs. Au bal in m’invite pàs. Déjà à l’école, in m’interrogeot pàs. Et ch’est come cha partoute !
-Cha, ch’est ce qu’os croïez.
-J’ay l’preufe doctor. Talheure, j’étos au photomaton et arguettez el résultat. »
Alle m’tendit 4 cases blanques toute vuides. Pis alle s’elva et alla à l’farniéte. J’ai fait parel, ej me sus lvé et j’étos à côté d’alle. Ch’étot el bas-solé (coucher du soleil) et aveuc l’leumière, alle avot des yux écanillés (étincelants). J’l’ai prise par l’main et j’li ai dit :
« Mi j’vos eune très bielle fémme. »
Alle m’a ravisé un instant et j’ai veu el solé dins ses yux. J’li ai dmandé si alle voulot aller rafraiquir el margoulette (boire un verre) aveuc mi et m’a arpondu aveuc plaisi. In est parti in ville et in est passé à lurlure (hasard) dvant l’photomaton. Y avot un panniau su lequel y’avot écrit « En panne ». Cha a rassuré l’dame. In s’est arvu sécamin fos pis el suite os la connaissez.
Gabriez Caux & F. Giroud
