4. I étot eune fos in 1900
I étot eune fos à Berlencourt el Cauroy in 1900
02/12/2018
Imaginez Berlincourt-el Cauroy in 1900 : i y a l’câtiau et pis quéques cinces su l’route principale et tout autour chal bielle forêt d’Berlincourt.
Dins chaque camp, in peut vir chés vaques et dins chaque cour ed cinse, un monchau d’fien (fumier).
In intind l’vie tout à l’intour : chés beuguelmints d’chés vaques, el cant d’chés cos (coqs) et d’chés osiaux. Chés gins, des brafes cinsiers, vous ravistent d’un drôle eul (œil) et quaind is sourient, in vot els dints miés à mites (expr : qu’il manque des dents).
Dins ch’village, y a un garçon qui s’lomne Gabriel dit ch’Gab et qui va à l’école à pied. I dot aller dech Cauroy à Berlincourt par el plu court qu’min ch’est à dire pa l’forêt. Alle est privée mais M Devoisier, el comte, i dira rin. Chal forêt fait peur et ch’Gab cache (cherche) toudis après un copain pour faire route aveuc li. Alors, i prind sin sifflot manoqué (fabriqué) par li-même et chiffle à s’mote. I espère que quéqu’un li répondra. Ch’est Émile dit Ch’Mile el preume (premier). Chés deux chochons (compagnons) s’artrouftent. Ch’Gab est fin bénache car ch’Mile vint d’li apprinne eune bonne nouvielle : C’soér, ch’Gab sera persinté (présenter) à l’confrérie des Courageux.
Abile ! El cloque, alle sonne, i faut se dégrouller (grouiller) car l’marister (maîte), i est très sévère et n’a pas quer (aime) chés targettes (retardataires).
El soér, ch’Mile artreufe ch’Gab et sa bande derrière l’églisse sur el grante allée du câtiau.
« El confrérie des courageux de Berlincourt s’est réunie ch’jour du 17 brumaire, in commission extraordinaire pou parioler (parlementer) d’eune intrée probape d’un nouviau mimbe se prélommant (prénommant) ‘ch’Gab’ dit ‘Tite leunette’. Ch’dernier n’sra promu mimbe à part intière qu’après avoér réussi 4 épreufes.
1. Ramasser 50 guernoules in moins d’une heure.
2. Faire eune caresse à « Vilain » el quien des Merler*.
3. Aller coper un caon (poil) ed guernon (moustache) au père Delambre* pindant sin niquet (sieste).
4. Aller garoter (voler) eun baisse su l’bouque d’al bielle Ansquin* : Sabine. »
Pou el preume (première) épreufe, ch’fut eune partie rigolate pour ch’Gab car i n’avot pas l’vénéte (peur) par chés tites biêtes là. I connaissot un coin el long d’al Canche dù qu’i n’avot gramint. Aveuc un sa (sac) in plastique, i ramassa 50 guernoules in moins d’eune heure.
Pour la deuxième épreufe, che fut moins simpe. Tite leunette a quer des tites biêtes mais pas des greusses. Pis el quien des Merler, c’est pas el toutou à mamère mais un vrai quien d’warde (garde).
I est ahocqué (accroché) à un pieu, aboie très fort et fait des bonds ed 3 mètes quind in l’approche. Alors Ch’Gab prit sin courache à deux mains et alla tout d’boute (direct) in direction ed « Vilain », chal bourle au vinte et aveuc eune pognie (poignée) ed croquettes dins eune main. « Vilain » vit l’margat (gamin) arriver et commincha à argibonder (chahuter). Ch’Gab s’approcha douchmint, jechta ses croquettes à ses pieds mais visibelmint (visiblement) cha l’intéressot pas vraimint. Impossipe d’ l’ aflater (caresser), i n’faisot que d’brayer. « Gintil, qui disot ch’Gab, gintil toutou, t’as quer les croquettes hein ? » Mais cha marchot pas. Hureus’mint qu’l’cinsier i a venu et a fait taire sin quien. Queulle chance pour tite leunette, i a pu faire une catoulle à Vilain et réeussir l’deuxième épreufe.
Cha s’complique pour Tite lunette. Ch’est que l’père Delambre, i a un caractère à bourloche (sale caractère) I a une greusse voix qu’in intind dusqu’à Avesnes-el Comte. El père Delambre, i faisot toudis s’niquet (sieste) dins s’gardin après un bon rpas souvint ch’li du dimainche. Alors Ch’Gab i va vers el gardin du père Delambre aveuc eune paire d’cisiaux. Vinguette, el quien a racusé (sonné l’alerte) ; abile, abile (vite) ! Tite leunette, i est arcinqué (motivé) et pis i est accoutumé (habitué) des pizingues (grognon), sin père ch’est un rute auchi. I prind ses cisiaux et copa un gros bout ed moustache et cha a fait CROUIC. I a détallé d’là, tout bénache d’avoér réussi sin cop.
Pou l’dernière épreufe, cha a l’air tout simpe à première vue mais tite lunette ch’est un grand bunneu (timide) et les histoéres ed cuer (cœur) ch’est pas sin truc. Pou réeussir chelle épreufe, chés gars d’al confrérie l’ont aidié un peu. I a fait un tchiot bouquet margrites (marguerites) et a apprins quéques bielles phrases par cœur. I s’a dallé vir insuite Sabine, li a donné sin bouquet et li a déclaqué (déclamé) tout in long :
« Sabine,
T’es bielle comme el jour,
Tes yux brillent comme chés étoles,
Te sins bon l’violette. »
Sin cœur battait comme un tchul d’moniau (expression pour dire que son cœur battait très vite) car jamais i n’avot déblouqué sin cuer à eune jonne file.
Sabine étot rouche comme eune tomate, comme crampie (paralysée). Tite lunette sintit que ch’étot l’momint et in profita pour li voler eune baisse (baiser) su l’ bouque.
I a arparti in cueurant (courant) et criant à tue-tête qu’i avot réeussi. Chal bielle Sabine pinsot qu’ch’étot pou alle mais ch’Gab savot qu’ch’étot pou aute cosse.
Ses copains l’attindotent (attendaient) comme à la fin ed chaque épreufe pou l’féliciter.
El soér, ch’Gab artreuva sa bande derrière l’églisse et après eune tite cérémonie, i rintra dins l’confrérie des courageux de Berlincourt-le Cauroy. In escrivit sin nom su un cartabelle (registre); désormais i faisot partie d’al bande.
Allez savoér pourquo, mais Ch’Gab a fait eune dmande pou que Sabine rinte dins l’confrérie.
Gabriez Caux
Fin
Merler, Ansquin et Delambre : familles de Berlancourt- le Cauroy
