3. Pourquo qui draque au mos d'may
Pourquo qui drache au mos d’mai ?
Le 2/12/2018
Pourquo qui drache au mos d’mai ? Ch’est à causse ed Raymond.
Raymond ch’est une brafe homme qui reste (habite) à Marquisse.
L’histoére, s’passe un biau dimainche insolélié du mos d’mai.
Raymond, après avoér forché un peu su l’biére aveuc s’frites qu’Simone, eus féme, alle avot préparé aveuc amour; i s’est aponé (affalé) su sin canapé à raviser l’foot à l’télé.
Vlà, Simone qu’alle li prind l’invie d’aller bisir (bronzer) à Wissant. Mais Raymond, li, i aimot miux (préférait) rester à s’mason seurtout qu’i avot bzon d’cuver sin trop-plein. Bon, comme ch’étot un bon zigue (un brave gars), i n’a pas su dire nan et les vlà partis pou Wissant.
Mais eune fos arrivée, cha a été pire que tout.
D’abord, i a mis eune heure à treuver eune plache à s’garer.
In ouvrant s’portière, i l’a poquée su l’mur car i étot trop près.
Et pis après, is ont marché trinte minutes pour aller su l’plache.
Mais is étotent pas al coïette car i y avot des éfants qui argibonotent (chahutaient) et pis qui faisotent du carpin (bruit). Raymond i pouvot pas s’arposer alors, i a parti treuver eune aute plache mais su l’sape frec (mouillé). I a pas pu mette s’capiau su tiête car i s’a involé aveuc eus vint d’amont (nord).
Pis après, is ont crapahuté 1 kilomète pour cacher (chercher) chal mer qui étot basse et très lon (loin) et aussi très frote. Pou s’réchuer (sécher), Raymond i artreuve s’serviette avec eune bielle tiure (chiure) ed mouette. « Droulie d’brin » (bordel de merde) qui dit !
Pis in fin journée, tout arcrans (épuisés) et azis (brûlés) comme des sauchisses, is ont rimballé leu incrinquillache (affaire) pis ont artourné à Marquisse.
Mais quaind Raymond i a artreuvé s’carette, i a gaingné une prone pasque i étot mal garé.
Alors i elva chés yux au cié (ciel) et dit « Min Diu, pourquo te m’fais toutes chés misères ? » El bon Diu, i l’a acouté car edpis ch’timps-là, i drache toudis au mos d’mai.
