Tutur
Tutur
J’me lomme Arthur mais tertous i m’appelle Tutur. Em vie n’a pàs toudis été fachile surtoute dins jonesse. J’étos pàs un écoïer brillant. J’avos pàs quer l’école. Quind i fallot carculer, j’me gouros à chaque fos et quind i fallot foaire eune dictèe, j’avos eune faute à chaque mot. El maîte i étot dur aveuc mi pourtant mi, j’l’faisos pàs esprès d’ête nul. J’aurai bin voulu ête come els autes mais j’n’y arrivos pàs. Mes parints is étotent durs aveuc mi pasqu’is pinsotent que j’étos un rut losse. Alors in m’traitot come un boubourse. J’intindos toudis : « I fra rin ses dix dogts ch’rambile-là. Mais qu’est-ce qu’in va in faire ?» Alors ej sus parti in apprintissache mais là incore ch’étot pàs fachile. J’auros pu faire quétcosse mais min patrin (patron) i étot tellmint dur aveuc mis qui m’a dégoûté. Au final in s’est disputé et j’ai été viré. Mes parints is étotent in prousse (en colère) alorse j’ai été travalé àl mine. J’étos galibot à Bruay in Artois. El vie mineur, ch’étot très difficile mais j’voulos pas déchevoèr mes parints cor eune fos alors j’faisos tout min possipe. El porion, i étot dur aveuc mi mais j’disos rin car j’comminços à avoèr l’habitute d’me faire traiter d’abrandoule. Un jour qué j’saquos l’barrou come un forchené, j’me sus cassé bras et in m’a invoé à l’hôpita. El preume fos qu’j’ay vu l’infirmière, alle m’a ravisé aveuc des yux d’biche et m’a dit : « Tout ira bien jeune homme, on va bien s’occuper de toi. » Jamais in m’avot parlé aveuc autant d’doucheur de toute em vie si bin qu’j’me sus dit : « Ch’est ichi que j’veux vife. » In sortant l’hôpita, j’ay tout fait pou trouver un tit traval et j’sus dvénu gardinier puis quéques annèes plu tàrd, agint d’intretien. Ichi tertous me respeque et j’sus hureux.
I m’avos manqué chelle intinchelle d’amour que m’avot donné l’infirmière.
Gabriel Caux
Banque chtimi
