Banque chtimi : une banque de mots chtis

Marie la chorcelle                 

Marie resteut (habitait) el villache de Templeuve dins eune tiote masure tout lez (près) dal forêt. Ch’éteut eune file timite. I faut dire qu’alle n’aveut  ni sœur ni frère aveuc qui babeler (bavarder) ou juer  ni d’ copin-nes (copines) aussi.

S’mère alle s’occupeut pas trop d’alle à cause d’sin traval de buresse et pis comme alle n’resteut pas l’villache  et qu’alle n’alleut pas à l’églisse, alle éteut fin (fort)  renictée  (critiquée).

In n’saveut pos qui qu’ch’éteut sin père. Les gins du villache, qui ont quer ed caloder, diseutent que ch’éteut un chorceron (sorcier) mais ch’éteut tout bonnemint un boquillon (bûcheron) ed passache qui s’a dallé aussi fel (vite) qu’i a venu.

Comme in s’timps-là, y n’aveut pas d’écoïe (école), alle a grindi à l’écart du villache et comme alle canleut (conversait) aveuc peu gins, alle aveut développé eune seurte ed parlage prope à elle.

Marie aveut quer la nature. A l’bielle saison, in la voyeut cueurir après ches pavioles (papillons) et ches malots. A l’morte saison, alle fabriqueut de drôles ed bidules aveuc tros quate bougeons (bout de bois) et un peu d’mousse. Les gins trouveutent cha drôle  (bizarre).

Tiote Marie n’étot pas un glout-morciau (beauté) : alle aveut un nez à arpiquer des porions, alle éteut sé comme une patte eud bidet pis en pusse, ch’éteut eune branque ed'thym (une rousse).

In grandissant cha s’est pos arringé et pis alle n’aveut pas trop quer des batées, alle éteut un brin broustia (négligé)   pis  mal loquée.

Un jour, à cause d’sin dur ouvrache, s’mère alle s’a dallé in voé (s’en être allé) et l’paufe Marie s’a artrouvé tout seule. En fait pos vraimint, alle aveut adopté un tchiot cat noir comme du carbon et ch’éteut sin seul ami.

Elle vouleut arprin-ne el traval d’eus mère mais peursonne li faiseut fiate (confiance).

Quind alle traverseut el village, les gins s’gobeutent (moquaient) d’alle alors, alle grouleut (grommelait) des mots que peursonne ne compreneut.

Marie finit par s’arcroqueviller dins s’masure. Alle alleut dins l’forêt à cache (recherche) de plintes commestipes ou de fruits des bos. Dès fos, des éfints curieux s’approcheutent de s’masure et alle éteut gintile aveuc. Alle leur donneut chou qu’alle aveut : des pomelots (pommes sauvages). Les éfints, quand ils arveneutent chez euses, is raconteut toute mais leus parints leur diseutent de pas minger chou qu’alle donneut car ch’éteut du poison.

Un jou, après un rute arnu, el motié deuch tot i s’a involé. Pour Marie se fut terripe. Qué malheu ! Alle n’aveut pas doupes (argent) pour artaper s’toture.

Chanche pour alle, un gars du village vint la vir pou li demander pou ête accouchèse (sage-femme). Peursonne vouleut faire eus traval-là, mais comme Marie aveut bezon d’argent et qu’alle aimeut la vie, alle  dit oui.

L’accouchemint s’passa ma pou el paufe Marie. Pourtant elle aveut fait tout sin possipe mais rin à faire, ch’nénin i est mort al naissance.

Les gins disot qu’ch’étot de s’faute pésque (parce que) ch’étot eune chorchelle.

In fit donc sin plaid (procès).

In a dit qu’alle éteut diabolique car elle n’alleut pas à l’messe (ch’étot pas sin truc mais qui dit qu’alle n’y croïot pos).

In a dit qu’alle parlot un parlache satanique (ch’étot sin parlache)

In a dit qu’alle parlot aux bestiaux (alle avot quer chal nature)

In a dit qu’alle faisot des trucs drôles comme bricoler des bastringues  aveuc du bos (alle étot créatife)

In a dit qu’alle parleut à satan sous l’forme d’un cat (ch’étot sin tchiot cahou (minou))

In a dit qu’alle donnot du poison aux éfants (ch’étot des peimes un peu sure (acide))

In a dit qu’alle étot laizoue (laide) (ch’étot pas d’s’faute)

In a dit qu’alle étot crapée (ch’est vrai qu’alle étot un peu droulion (souillon) mais ch’étot pas eune princesse non plus)

Marie a donc été condamnée pour chorchèlerie. Pourtant, alle deveut ête ninoche (inocente)  ou,  coupape d’ête différente des autes.

Gabriez Caux

Imaginez Berlincourt-el Cauroy in 1900 : y a l’câtiau et pis queques cinces su l’route principale et atour dal bielle forêt d’Berlincourt.

Dins chaque camp, in peut vir des vaques et dins chaque cour ed cince,  un tas fien.

In intind l’vie tout autour ed ti : les beuglemints d’vaques, el cant des cos et des osiaux. Les gins, des brafes cinciers, vous ravisent d’un eul et quind is sorient, in vot bin qui minque des dints.

Dins c’village, y a un garçon qui s’lomne Gabriel dit ch’Gab et qui va à l’écoïe (école) à pied. Il dot aller deuch Cauroy à Berlincourt par el plus court quemin ch’est à dire par l’forêt. Alle est privée mais Mr Devoisier, el comte dira rin. Chal forêt fait peur et ch’Gab cache (cherche) toudis après un copain  pour faire route aveuc li. Alors, il prind sin sifflot fabriqué par li-même et siffle à s’mote. Il espère que quéqu’un li répondra. Ch’est Emile dit Ch’Mile el preume (premier). Les deux compagnons s’arroufent. Paul est bénache car ch’Mile vint de li apprin-ne eune bonne novielle : C’seoir, ch’Gab sera présinté  à l’confrérie des Courageux.

Habile ! Chal cloque, alle sonne, il faut se dépêquer car l’maîte, i est très sévère et n’a pas quer des artardataires.

El seoir, ch’Mile artroufe ch’Gab et sa troupe derrière l’églisse sur al grinde allée du câtiau. La confrérie des courageux de Berlincourt s’est réunie en c’jour du 17 brumaire, in commission extraordinaire pou parleminter d’eune intronisation probape d’un nouviau mimbe se prélommant  ‘ch’Gab’  dit  ‘Tite leunette’. C’dernier n’sera  déclaré   mimbe  à part intière  qu’après aveoir réussi 4 épreufes.

1. Ramasser 50 guernoules en moins d’une heure.

2. Faire eune caresse à « Vilain » el quien  des Merler*.

3. Aller coper un caon (poil) ed  guernon  (moustache) au père Delambre* pindant sin chouquet (sieste).

4. Aller garoter (voler) un baiser su l’bouque à la belle Ansquin* : Sabine.

Pou el preime épreufe, ce fut une partie rigolate pour ch’Gab car il n’aveut pas peur de ches tites biêtes là. Il connaisseut un coin eul long dal Canche d’où qu’i  n’aveut al ploute (à foison). Aveuc un sac in plastique, il ramassa les 50 guernoules in moins d’eune heure.

Pour la deuxième épreufe, ce fut moins facile. Tite leunette  a quer des tites biêtes mais pos des greusses. Pis el quien des Merler, c’est pos el toutou à mamère mais un vrai quien d’warde (garde).

I est ahoqué (accroché) à un pieu, aboie très fort et fait des bonds ed 3 mètes quind in l’approche.

Alors Ch’Gab prit sin courache à deux mains et alla direct in direction ed « Vilain », la boule au vinte et aveuc eune pognée ed croquettes dins eune main. « Vilain » vit l’intrus arriver et comminça à argibonder (chahuter). Ch’Gab s’approcha douchemint, jechta ses croquettes à ses pieds mais visiblement cha l’intéresseut pas trop Vilain. Impossible ed l’catouïer (caresser), i n’faisot que d’brayer. « Gintil, qui diseut ch’Gab, gintil toutou, t’as quer les croquettes hein ? » Mais cha marcheut pos. Heureusemint qu’l’cincier i a venu et a fait taire sin quien. Quelle chance pour tite leunette, i a pu faire une catoule à Vilain et réussir l’deuxième épreufe.

Cha s’complique pour Tite lunette. Ch’est que el père Delambre, i a eune réputation ed dur à cuire. Il a une greusse veux (voix) qu’in intend esqu’à Avesnes-el Comte. El père Delambre, i faiseut toudis s’niquet (sieste) dins s’gardin après un bon repas souvint ch’li du diminche. Alors Ch’Gab s’dirigea vers el gardin du père Delambre aveuc eune paire d’ciseaux. Vinguette, el quien a sonné l’alerte ; faut faire vite ! Tite leunette, i est motivé et pis i est habitué des criniu (gronion), sin père cha n’est un rute aussi. I prit ses ciseaux et coupa un gros bout ed moustache et cha a fait CROUIC. Il s’a désaqué (se tirer de là)  tout bénache d’aveoir réussi sin cop.

Pou l’dernière épreufe, cha a l’air tout simpe à première veue (vue) mais tite lunette ch’est un grind timite et les histeoires ed cœur ch’est pas sin truc. Pour réussir chette épreufe, les gars dal confrérie l’ont aidé un pew. Il a fait un tchiot bouquet margrites (marguerites) et a apprins quéques bielles phrases par cœur. Il s’a dallé vir insuite Sabine, li a donné sin bouquet et li a déclaqué (déclamé) tout du long :

« Sabine,

T’es bielle comme el jour,

Tes yiux brillent comme des étoles,

Te sins bon l’violette. »

Sin cœur battait comme un tchul moniau* car jameus i n’aveut parlé ainsin à eune jone file.

Sabine était rouge comme eune tomate, comme paralysée. Tite lunette sintit que ch’éteut l’momint et in profita pour li voler sin baisse sul bouque bin évidemment.

Il a arparti in ceurant et criant à tout va qu’il aveut réussi. La belle Sabine pinseut qu’c’éteut pour alle mais ch’Gab saveut qu’c’était pour aute cosse.

Ses copen-yes (copains) l’attindeutes  comme à la fin ed chaque épreufe pou l’féliciter.

El seoir, ch’Gab artreuva sa bande derrière l’églisse et après eune tite cérémonie, il rintra  dins la confrérie des courageux de Berlincourt-le Cauroy. In inscrivit sin nom su un registe ; désormais i faiseut partie dal bande.

Allez saveoir pouquo mais Ch’Gab a fait eune deminde pou que Sabine rintre dins l’confrérie.

Fin

 Gabriez Caux

Merler, Ansquin et Delambre : familles de Berlancourt- le Cauroy

cœur battait comme un tchul moniau : expression pour dire que son cœur  battait très vite

Pourquo qui drache au mos d’mai ?

Ch’est à causse ed Raymond.

Raymond ch’est une brafe homme qui reste à Marquisse.

L’histoere, s’passe un biau diminche insoleillé du mos d’mai.

Raymond, après avoer  forché un pew su l’bire aveuc ses frites qu’Simone eus fème, alle aveut préparé aveuc amour; i s’est aponé (affalé)   su sin canapé à raviser l’foot à l’télé.

Volà, Simone li prind l’invie d’aller bisir (bronzer) à Wissant. Mais Raymond, li, i préféreut rester à s’mason surtout qu’il avot bezon d’cuver sin trop-plein. Bon comme il éteut brafe, il n’a pas su dire nan et les volà partis pou Wissant.

Mais eune fos arrivé, cha a été pire que toute.

D’abord, i a mis eune heure à treuver eune plache.

In ouvrant s’portière, il l’a poqué su l’mur car il étot un tiot peu près.

Et pis après, is ont marché trinte minutes pour trouver une place su l’sape. El preume (première) al étot pas terripe car y avot des éfants qui argibondotent (chahutaient) et pis qui faisotent du buzin. Raymond i pouvot pos s’arposer alors, il a parti treuver eune aute plache mais su l’sape fraique. Il a pas pu mette s’capiau su tiête car i s’a involé aveuc eus vint d’voleu.

Pis après, is ont grapahuté 1 kilomète pour cacher (chercher) chal mer qui étot basse et très lon et aussi très froite.

Pis in fin journée*, arcrans (épuisés) par chette journée et azis (brûlés) comme des sauchisses, is ont rimballé leur frusquin pis artour à Marquisse.

Mais quind Raymond i a artrouvé s’carette, i a veu une preune pasque il étot mal garé.

Alors i leva les yux au ciel et dit « Min Diu, pourquo te m’fais toutes ches misères ? » Eune mouette li a quié d’su ; ch’étot pit-être eune réponse. J’cros bin qu’el bon Diu, il l’a acouté car edpis c’timps-là, i drach toudis au mos d’mai.

* : se prononce journay

Gabriez Caux

I étot eune fos, eun coupe ed gins de ch’Nord bin amiteux qui restotent à Berlincourt-el Cauroy.

Li, i s’appelot Edmond et ch’étot eun brafe homme ed 40 piges pis alle, alle s’appelot Ginette et ch’étot auchi eune brafe fème ed 40 piges parèl. Bref os l’aurez comprins ; ch’étot des quarantenaires  bin brafes.

Un jour qu’i faisot allape (temps agréable pour sortir) , is décidèrent d’aller faire eune tite randoulette au bord d’al Canche, histoere ed prinne l’air et pis surtout, minger eune tchiote porchion d’frites aveuc eune bonne bire au bistrot du villache (s’il est cor là). Alors, qu’is marchotent trintchillemint bras ed-zus bras ed-zous, is rincontrèrent, au détour d’un quemin, eune bonne fée.

Chal fée leu dit comme cha: « Cha fait bin longtimps qu’ej vous ravise et pis comme ej troufe qu’os êtes un fin biau coupe et pis qu’aussi ch’est min jour ed bontée*; ej vas vous accorder un vœu à chacun d’vousautes. Alors mes brafes gins, quo ch’est qu’i vous ferot plaisi ?»

El fème toute bénache d’ch’t’affaire-là, prind l’parole pis dit : « Ej voudreus bin faire eul tour du monte aveuc min homme, vir New-York, Tokyo et tout cha !» El fée arlota s’baguette magique et prononcha s’formule: "Abracadabra". Soudain, i apparut un billet d'avion dins l’main d’Ginette.

Quand vint el tour d’Edmond, chti-ci i dit : « Euh..., ch’est bin romantique tout cha mais comme eune opportunité comme chelle-là n'arrife qu'eune fos dins s’vie ; alors ej sus désolé, ma tchiote Ginette, mais mi j'aimereus bin aveoir eune fème qui a 20 piges ed moins qu’mi ! »

Ginette fut terriblement défoutue (déçue) par sin homme d’intinte eune cose parèle.

Alors, l’fée fit cor marcher s’baguette magique et Edmond s’artrouva aveuc 20 ans d’plus ; ce qu’i li faiseut 60 ramons !

Moralité pour ches hommes :

Des fos, vaut miux rester à s’baraque edvint s’télé aveuc ches frites pis s’bière plutôt que sortir aveuc bobonne et pis dire des carabistoules al première bonne fème qui vient.

* fée, bontée : se prononce  _aye

d'après une histoire drôle