1. Chal bonne fée ed Berlincourt-el Cauroy
02/12/2018
I étot eune fos, eun coupe (couple) ed gins de ch’Nord bin amiteux qui restottent (habitaient) à Berlincourt-el Cauroy.
Li, i s’appelot Edmond et ch’étot eun brafe homme ed 40 piges pis alle, alle s’appelot Ginette et ch’étot auchi eune brafe féme ed 40 piges tout parel. Bref os l’arez comprins ; ch’étot des quarant’naires bin brafes.
Un jour qu’i faisot allape (temps agréable pour sortir) , is déchitent d’aller faire eune tite randoulette (randonnée) au bord d’al Canche, histoére ed prinne l’air et pis surtout, minger eune tchiote portion d’frites aveuc eune bonne bière au troquet deuch villache. Alors, qu’is marchotent trinquil’mint à badine (bras dessus bras dessous), is tombent nez à nez su eune bonne fée au détour d’un quemin.
Chal fée leu dit comme cha: « Cha fait bin longtimps qu’ej vous ravise et pis comme ej treufe qu’os êtes un fin biau et pis qu’aussi ch’est min jour ed bontée*; ej vas vous accorder un vœu à chacun d’vous-autes. Alors mes brafes gins, quo ch’est qu’i vous frot plaisi ?»
El féme toute bénache d’ch’t’affaire-là, prind l’parole pis dit : « Ej voudros bin faire eul tour du monte aveuc min homme, vir New-York, Tokyo tout cha !» El fée allote (secoue) s’baguette magique et prononche s’formeule: "Abracadabra". D’un cop, i apparot un billet d'avion dins l’main d’Ginette.
Quand ch’est el tour d’Edmond, chti-ci i dit : « Euh..., ch’est bin romantique tout cha mais comme eune opportunité comme chelle-là n'arrife qu'eune fos dins s’vie ; alors ej sus désolé, ma tchiote Ginette, mais mi j'aim’ros bin avoér eune féme qui a 20 piges ed moins qu’mi ! »
Ginette fut terriblement défoutue (déçue) par sin homme d’intinte eune cose parelle.
Alors, l’fée fait cor marcher s’baguette magique et Edmond s’artreuva aveuc 20 ans d’pus ; che qu’i li faisot 60 ramons !
Moralité pour ches hommes :
Des fos, vaut miux rester à s’baraque dvint s’télé aveuc ches frites pis s’bière putôt qu’sortir aveuc bobonne et pis dire des carabistoules al première bonne féme qui vient.
